01 February 2024 | Foreign Affairs.
Ekselans Imsye Prithvirajsing Roopun – Prezidan Repiblik Moris,
Onorab Premye Minis Pravind Jugnauth,
Ekselans,
Envite distinge,
Ser frer ek ser Morisyen,
Permet mwan, tou dabor, pou remersye senserman mon frer ek zanmi Pravind pou envit mwan koman Envite Doner pour sa levennman vreman enportan ki konmemor 189-an depi labolisyon lesklavaz Moris.
I en loner pour mwan partaz sa moman istorik e emosyonnel avek zot tou. Nou’n rasanble ozordi pour nou rann omaz a tou nou zanset ki’n soufer anba sa krim lesklavaz, e apre ganny oprimen par travay forse. Nou pa pou zanmen bliy zot e bliy zot kontribsyon dan konstriksyon nou sosyete.
Lesklavaz dan tou son laform i konstitye enn bann sapit pli nwar dan listwar limanite. Pandan plizyer syek, de milyon zonm, fanm ek zanfan ti sibir pli pir lopresyon ki nou kapab imazinen, kot zot laliberte ek zot dinyite ti ganny pran avek zot, ganny trete koman en senp komodite, e zot lekor ek zot lespri imen ganny brize par en sistenm kriyel e opresif. Komers ek biznes lesklav, alimante par vorasite pou fer larzan ek en fo krwayans dan siperyorite rasyal, ti desir fanmir ek kominote, e devaste antyerman plizyer sivilizasyon.
Sepandan, parmi lorer lesklavaz, en lespri rezistans ek rezilyans ti aparet koman en laflanm ardan pou defye lenzistis ek lopresyon. Lalit ek konba nou zanzet, zot rezilyans anfas ladversite, zot determinasyon solid pour laliberte i en veritab testaman kouraz ek kapasite imen pou sirmont menm bann lobstak pli feros e pli dir.
Leritaz lesklavaz Moris ek Sesel i partou. Leritaz lesklavaz ek son soufrans i kontinyen zet en lonbraz lo nou konsyans kolektif, e fer nou rapel labi ek kriyote imen ki ti egziste dan nou sosyete. Leko sa peryod tris e sonm dan nou listwar i kontinyen rezonnen dan fabrik nou sosyete e fasonn profonnman nou lidantite ek nou kiltir, menm si i kontinyen les en sikatris lo nou memwar.
I osi enportan ki nou pa oubliy tou sa bann milyon dimoun atraver lemonn ki viktim lesklavaz modern ek leksplwatasyon ozordi, dan en laform ou en lot, koze par bann konfli global, dezekilib ekonomik, mank ledikasyon, mank bann servis debaz, lafen, maladi ... I en devwar pour nou, espesyalman an konesans nou pase, pou kontinyen sansibiliz kominote enternasyonal lo sa fleo modern e kontribye pou elimin li.
Dan sa kontex, Moris ek Sesel pou kontinyen reste angaze dan nou demars kolektif pou promouvwar e defann drwa imen, dinyite imen, ek laliberte nou pep.
Ekselans Imsye Prezidan,
Onorab Premye Minis,
Ekselans,
Envite distinge,
Imsye, Madanm,
Listwar Moris ek Sesel i en tablo ki’n ganny penn avek larm, soufrans, lalit ek sakrifis nou zanzet. Kiswa dan plantasyon kann Moris swa dan plantasyon koko Sesel oubyen lo bann zil bokou zenerasyon lesklav Afriken, swivi par bann labourer dan sa sistenm barbar i’n travay anba sa soley tropik, e nouri avek zot lasyer ek zot disan sa later fertil nou zil. Depi sa peryod sonm lesklavaz ziska nou lendepandans, nou de nasyon i’n pas atraver bokou defi ek lobstak. Ozordi, ler nou rekonnet progre ki nou’n akonpli, annou pa oubliy nou leritaz komen et nou desten partaze ki ini nou.
Ozordi Moris ek Sesel i de nasyon fyer e endepandan. Nou leritaz ek nou desten i’n ganny fasonnen par en konverzans diferan kiltir sorti Lafrik, Lazi ek Lerop. An grann-parti, gras a sa bann lesklav Afriken e, apre zot, sa bann travayer Endyen, ki’n ganny transporte lo nou zil, nous sosyete i’n ganny marke par diversite e miltikiltiralism. Menm si nou listwar i ranpli avek douler ek soufrans, i osi en temwanyaz trionf lesprit imen lo ladversite.
Annou, anfin, pa bliye ki se bann lyen ant nou pep ki konstitye fondasyon relasyon ant nou. Mon swete, a sa stad, mansyonn mon prop lyen avek Moris. Mon aryer granpapa, ki ti sorti Bihar, ti anbark lo en bato Calcutta e apre en vwayaz douz semenn i ti debark Moris. Apre son lanmor, mon aryer granmanman ti vin Sesel avek son de garson e enstal zot lo zil Praslin. Enn parmi sa de garson ti vin mon grandpapa... Zot aryer pti-zanfan – mwan Wavel – mon ti vin Moris dan bann lannen 80/90 pou fer letid teolozi, apre kwa mon ti ganny ordonnen koman pret Anglikan. Vwala donk mon koneksyon personnel avek Moris – en koneksyon ki’n les bann souvnir inoubliab dan mon leker e dan leker mon fanmiy. E letan mon azout sa de morso Afriken ek Endyen, tou lede dan lesklavaz ek travay forse, mon annan tou rezon pou selebre le 1 Fevriye dan lafyerte avek mon frer ek ser Morisyen.
Ekselans Imsye Prezidan,
Onorab Premye Minis,
Ekselans,
Envite distinge,
Ser frer ek ser Morisyen,
Mon pa kapab termin mon diskour san mansyonn kestyon Chagos. Nou selebre ozordi laniverser labolisyon lesklavaz Moris. I reste nou aprezan pou selebre dekolonizasyon KONPLET Moris! Pozisyon Sesel lo sa size i kler e ferm. Nou siport antyerman e san rezerv Moris dan son zefor ek son parkour pour retourn Chagos anba souvrennte Morisyen. Nou sipor i baze lo prensip lazistis, souvrennte nasyonal, lentegrite teritoryal e respe pour drwa enternasyonal. Moris i annan tou drwa lo Chagos e nou denons avek viger tou lesey pou niye li son souvrennte. Ansanm, nou pou kontinyen debout avek Moris e soutenir li fermemam dan son parkour pour rekonesans son souvrennte ek lazistis.
Ekselans Imsye Prezidan,
Onorab Premye Minis,
Ekselans,
Envite distinge,
Imsye, Madanm,
Zot semen, nou semen, ver lemansipasyon ti ranpli avek defi, avek douler, me osi avek trionf ek laviktwar. Depi labolisyon lesklavaz ziska nou lendepandans, nou de nasyon i’n travers bokou tanpet lo nou vwayaz progre. Sepandan, malgre tou lobstak ki nou ti rankontre, nou’n sorti pli for e pli rezilyan, ini dans nou determinasyon pou konstri en lavenir fonde lo bann prensip laliberte, legalite, byenet sosyal, materyel e spirityel, e lazistis pour tou nou sitwayen.
Omoman ki nou pe komemor laniverser labolisyon lesklavaz Moris, nou bezwen tir leson nou pase e redouble nou zefor pou konstrir en lavenir ankor pli zis, kot zanmen personn ankor pa ganny oprime. Nou bezwen onor memwar tou nou bann zanset ki’n soufer e mor anba lesklavaz e travay forse. Nou bezwen reste enspire par rezilyans ek determinasyon nou zanset pandan ki nou pe tras en semen pli briyan, pli prosper, pli zis e pli enklizif pour nou zenerasyon fitir.
Annou reafirm nou langazman pour promouvwar e defann dinyite e drwa tou dimoun, san pran an konsiderasyon zot ras, zot etnisite oubyen zot kwrayans. Annou debout ansanm koman de nasyon fyer e endepandan, ini dan nou patrimwann partaze ek nou limanite komen.
Nou’n sorti dan lonbraz, dan fernwar nou pase, an progresan lo semen devlopman ek prosperite. Ozordi, Moris ek Sesel i ganny iniverselman rekonnet e konsidere koman de far(pwen referans) lespwar dan nou rezyon. Nou listwar partaze ek nou relasyon bilateral ekzanpler i depas tou frontyer ek tou limit!
Annou, ansanm, kontinyen reste en legzanmp lespwar dan sa monn divize. Annou kontinyen travay ansanm pour en lavenir ankre dan bann valer laliberte, dinyite et legalite pour tou nou sitwayen.
Viv laliberte ek drwa tou imen.
Mersi!
