Sa lannen nou pe selebre 39enm edisyon Festival Kreol e ozordi Lazournen Enternasyonal Kreol. Sa i anmenn nou tou konman en nasyon Seselwa bokou lafyerte pou vwar lakantite progre e bokou akonplisman dan sa domenn.

Anmezir ki nou selebre lazournen enternasyonal Kreol, komemore par diferan aktivite, sa i osi en moman pour nou reflesir lo kwa sa i vreman vedir pour sakenn de nou e dan ki fason nou kontinyen prezev sa kiltir e patrimwann Kreol nou zanset.

I primordyal ki a tou moman nou kontinyen reste fyer nou leritaz kreol. Sesel i’n vin kapital kreolofonn dan lemonn e Festival Kreol in vinn en levennman kin ed nou pour apresye plis nou kiltir e partaz li avek son larisese avek leres lemon. Pou sa lokazyon, lo lapar pei mon felisit nou nasyon Seselwa pour prezervasyon ek promosyon nou kiltir Kreol. Nou langaz Kreol ki bers nou depi nou lanfans i form en gran parti sa leritaz kreol.

Ozordi nou annan plizyer zouti  lengwistik Ki Ed nou devlop nou abilite pour ekri Kreol Seselwa.

Mon osi remersye tou bann ki’n travay avek konviksyon pour sovgard, devlop e promouvar nou kiltir kreol.

Annou konman en pep valoriz nou lidantite kreol Ki fer nou inik dan lemonn.

Bonn fet selebrasyon kreolite!