Nwel in vin en lafet iniversel ki ganny selebre dan mazorite pei atraver lemonn. Pour kretyen i annan en gran sans relizye, akoz i sa zour ki kretyen i komemor nesans Zezi, Sover e Mesi limanite.

Me Nwel in vin sa moman kot dimoun i montre zot gratitid anver kanmarad e I vin en moman kot en pti kado i ganny partaze. Sa pti kado, en kart Nwel oubyen en mesaz avek bann bon soue, e eksprim lanmour ek lapresiasyon en dimoun anver en lot i tous leker.

Sa Nwel pa pou parey pour bokou fanmiy dan nou zoli pei Sesel. Swa, serten fanmiy pou mazin sa byeneme kin kit zot pandan sa lannen, kek maler ki’n arive, komemorasyon premye lannen labsans en manm fanmiy oubyen en zanmi, oubyen pour lezot rezon.

Mon konnen ki levennman le 7 Desanm i ankor o-vif dan lespri dimoun. Bokou i ankor pe ganny kosmar e dan lakour pa parey. Mon alor profit sa moman Nwel pou partaz en mo kouraz avek tou fanmiy kin ganny afekte. Mon oule ankor enn fwa reasir zot ki avek lasistans leta ek led lezot dimoun e pei, nou pou travay pou atrap zot lanmen pou travers sa move lepizod.

Letan mon mazin Nwel, mon osi mazinen ki sa nesans ki nou pe selebre ti ariv dan en letab. Savedir, dan en landrwa etranz. I pa ti ariv dan lakour. Sa osi pou larealite serten dimoun, akoz zot ankor pe reste dan en landrwa ki pa dan lakour. Me mon osi dan sa levennman mazinnen ki ti annan dimoun bon ker ki ti montre konpasyon ek lanmour.

Alor mon anvi servi sa letan Nwel pou ankor enn fwa eksprim lapresiasyon anver tou dimoun kin sorti dan zot konfor pour ed en frer, en ser, en zanfan, en fanmiy dan sa bann moman difisil. Zot konpasyon, devosyon ek lanmour in vreman vin en kado dan limenm. Mon senpleman anvi dir mersi e ki Bondye i akord zot tou benediksyon.

Wi, kretyen I war Nwel koman en sinny lespwar pour limanite akoz lafors lemal ek pese I ganny defet e lalimyer I ranplas fernwar. Alor mon profite pou envit zot tou pou war sa menm lalimyer pour nou pei. Annou rekonstri sa kin ganny detri e annou port nou latansyon lo en meyer demen kot lanmour, lape, lazwa ek lasazes i ranpli nou leker.

Dan sa selebrasyon Nwel, annou donn Bondye pli gran kado : Annou donn li nou leker e les li transform sa menm leker pour ki i ava ranpli avek en vre lespri pou servi lezot, senm linite, propaz lanmour e fer nou tou viv dan pli gran solidarite kan nou kontan nou prosen parey nou kontan nou prop lekor. Les lalimyer sa zetwal lespwar briy lo nou e diriz nou tou.

Ki Bondye i renny lo nou pei e dan leker tou zabitan.

Zwaye Noel tou Seselwa.