Statement by the President of the Republic of Seychelles
Mr Wavel Ramkalawan
Occasion: Nomination of the moutya dance on the UNESCO World Heritage list for Humanity, on 15th December 2021.
“Le 15 desanm 2021, pou ganny marker dan listwar nou pei Sesel koman en dat tre enportan. Moutya, enn nou leritaz e senbol kiltirel enportan ki atas nou avek nou pase e en sapit tris e malere dan listwar lesklavaz, ek limanite in ganny azoute e rekonnet lo lalis patrimwann mondyal pou lemonn atraver UNESCO, parey Valée de Mai e Aldabra.
Sesel pe aprezan partaz son leritaz kiltirel avek planet antye e i en gran moman lafyerte e lazwa pour tou Seselwa. Dezorme, moutya i apartenir pour tou pep ek nasyonalite, akoz in ganny rekonnet koman en ladans ki annan bokou signifikasyon kiltirel avek en rezonans global. Moutya i pa zis pour Sesel aprezan, me i pou osi rezonnen dan lespri lezot pep a traver lemonn, spesyalman bann ki’n konn leokri lesklavaz kot nou frer ek ser ti’n perdi zot idantite ek zot dignite.
Moutya i form parti nou leritaz Afriken. Leko tanbour moutya ek parol eksprimen dan bann sanson meyer lekspresyon nou zanset pou fer tande zot soufrans e martir sa lepok difisil. Ozordi in vin en senbol rasanbleman popiler ki ini nou ansanm koman en pep fyer nou lidantite kiltirel.
Mon tre onore pour sa lakonplisman, kot moutya i aprezan enn bann leritaz mondyal, e mon oule remersye tou bann dimoun ki’n travay dir pou fer sa arive. Mon espere ki nou a ganny sans dan le fitir partaz lezot aspe nou leritaz kiltirel avek lemonn antye lo sa menm lanpler.
Annou fer tanbour moutya rezonnen dan tou kwen nou teritwar e Seselwa debout fyer pour nou idantite kreol”
Mersi