Konpatriot,
Ser ek Frer Seselwa,

Se avek en leker lour ki mon enform zot ki ansyen Prezidan France Albert Rene in kit nou. Prezidan Rene in kit nou ozordi gran maten.

Lo lapar Governman, lo mon non personel e lapar mon fanmir, mon prezant nou profon kondoleans son fanmir e tou son pros.

Nou tou nou konn travay ki Prezidan Rene inn fer pour Sesel. Lalit ki in dirize pour Lendepandans e pour transformasyon Sesel pour benefis tou Seselwa. Pour Seselwa reganny son dignite, pour legalite loportinite, pour lazistis sosyal. I ti en vre patriyot avek en lanmour profon pour son pei ek son pep – pour zanfan, zenn, travayer e dimoun aze. I ti ankouraz Seselwa pou forz son lidantite e pou viv e selebre son kiltir.

I ti kree labaz pour Seselwa debout fyer akote lezot nasyon dan lemonn. Sete li, vreman, arsitek Sesel modern.

Ansanm avek lepep Seselwa, mon salye Prezidan France Albert Rene pour son travay.

An sinny respe, drapo nasyonal pou anbern apartir ozordi ziska zour servis finerer.