Konpatriyot, frer ek ser Seselwa,

Ozordi lannen, mon tre kontan ki ozordi monn kapab swet sakenn de zot partou kot zot ete en bonn fet lannen, e ki sa lannen i anmenn tou sa ki devret anmennen pour sakenn de zot. 

Konman sef deta monn fer bokou refleksyon, e dan mon refleksyon monn ariv lo de konklizyon. Premyerman, se ki mannyer pou donn en vre sans nou lekzistans isi lo later, e dezyenmman, ki nou devret fer an plis pou ranforsi nou linite nasyonal. E dan mon refleksyon mon kwar ki nou devret fer bokou plis pou nou adopte en konpa spirityel e moral ki a donn sa vre sans nou lekzistans isi lo later. 

Dan mon konklizyon monn vwar ki nou tou enkli mwan nou bezwen travay bokou plis pou anmenn sa linite dan pei. Alor, monn deside pou mwan propoz en lamannman dan lalwa ki gouvern konze piblik, ki pou fer ki dezormen Lendi apre Dimans Pak i vinn en konze piblik. I ava vinn en zour ki nou glorifye sa ki pli gran ki nou tou – nou Met, nou Kreater. Dezyenmman, ki le 5 Zen i en lazournen travay normal, e sa i avek bi ranforsi linite dan nou pei.

Konpatriyot, frer ek ser Seselwa, mon swe i ki nou kontinnyen viv konman frer ek ser dan lape e dan larmoni, dan stabilite e dan linite nasyonal.

Bonn Fet.