16 Novanm, 2012 -- Prezidan James Michel in akeir Prezidan France Albert Rene kot en resepsyon tradisyonel an loner 77yem laniverser Ansyen Prezidan, ansanm avek en gran nomn dimoun trwazyem az sorti tou bann distrik Sesel, kot StateHouse ozordi.
Sa resepsyon ti osi ganny asiste par Madanm Nathalie Michel, fanmiy Myse René, ansanm avek Prezidan James Mancham, Vis Prezidan Danny Faure, e lezot envite distinge. Bann ansyenn lotaz, ki ti pas 1 an Lasomali, Msye Rolly Tambara ek Msye Marc Songoire, ti parmi bann envite spesyal ki ti asize avek Prezidan Michel ek Prezidan Rene.
« Nou lazwa i gran pou akeir, tou dabor, Prezidan René parmi nou. Nou rasanble toulezan pou rann en temwanyaz vibran tou sa ki nou zenerasyon pli aze in fer pour nou pep. Nou profit sa lokazyon pour selebre laniverser Prezidan René, sa zonm ki’n touzour ganny dekri konman arsitek developman ekonomik e sosyal nou pei. Nou salye son vizyon e nou aplodi li byen for, » Prezidan Michel in dir dan son ladres.
Prezidan Michel in osi servi sa lokazyon pour demann tou bann zenn pou pran en pe letan e koz avek zot vye paran.
“Donn zot lokazyon osi pou eksprim zot, ekout zot konsey. Atraver zot leksperyans, aprann bann leson lavi. En manm nou fanmir ki aze i pa en fardo me plito en kado. Atraver son konesans ek son leksperyans, nou aprann bann leson lavi ki nou pa kapab trouve dan okenn liv. Ozordi alors, ankor enn fwa, nou zwenn ansanm avek lepep Seselwa annantye pour remersye nou zenerasyon pli aze e eksprim zot nou lafeksyon. Nou osi fer zot rapel ki Sesel i la pour zot zis parey zot ti la dan lepase pour nou.”
Prezidan in anonse ki Gouvernman i’n ankor enn fwa fer provizyon lannen prosenn pou donn en logmantasyon 200 roupi tou bann pansyoner.
Avan ki sa selebrasyon ti komanse Prezidan Michel ek son fiy Mamzel Laeticia in zwenn avek Myse ek Madanm Tambara e Msye ek Madanm Songoire, pour koz avek zot ek eksprim zot kontanman ki sa de msye in retourn se zot sen ek sof. I ti en swe personnel Mamzel Laeticia pou rankontre zot.
Lir Diskour Prezidan Michel an antye / Read President Michel's Speech