"Nou annan tou sipor lepep. E lepep i annan tou mon sipor. Nou oule en sosyete ki pli agreab pour sakenn de nou viv ladan. En sosyete sen pour nou zanfan ek zenn grandi e epanouir zot. Kot sa ki travay i kapab zouir fri son travay. Kot nou dimoun aze i kapab viv dan trankilite ek dinnyite. En Sesel kot i gou viv. En Sesel kot delekans, krim ek konportantman anti-sosyal pa ganny tolere me sanksyonnen efikasman e rapidman".
Avek sa deklarasyon, Prezidan James Michel in lans senpozyonm lo Renesans Sosyal dan lasal konferans STC. Respe, Responsabilite ek Solidarite ti bann valer fondamantal ki Prezidan ti idantifye koman bann vakler ki pour moter sa linisyativ. Prezan pou temway en lansman osi enportan ti Manm Diplomatik, Zidisyer ek Lezislativ.
Prezidan ti fer resorti ki le 20 Zilyet 2011 i ti formelman lans Kanpanny Renesans Sosyal ek ki atraver dyalog ki'n ganny fer dan bann distrik, landrwa travay ek lenstitisyon edikasyonnel, dimoun i'n eksrpim zot lide. Bokou lopinyon e sizesyon in ganny eksprimen kiswa fristrasyon, dezapwentman, loptimizm ou lespwar. Prezidan Michel ti refer sorti fortman ki kanpanny Renesans Sosyal i en mouvman nasyonal, ki devret reste dinamik.
 "Nou pa kapab kontinnyen lo sa semen lesefer, san kontrol, kot pour bokou dimoun medyokrite ek krim in vin en fason viv. I nepli ler pour nou aksepte vin otaz dan nou prop lakaz. Sak paran i oule vwar son zanfan grandi byen, al lekol ziska liniversite si posib, e apre ganny en bon travay. Nou zanfan pa kapab kontinyen grandi anba menas drog. Dan Nouvo Sesel, sak Seselwa pou bezwen pran son responsabilite, dan en bon kiltir travay ek bon konportman," Prezidan in dir.
Prezidan in remarke ki annan bezwen pour parn bann aksyon le pli vit posib.
"Napa letan, resours ou kapasite pour kontinyelman trenn bann ki kale, pares ou ki le fer sikse lo ledo lezot. Swa devan nou tou i klerleve, debourye, travay e pran nou responsabilite. Kot ou tonbe, nou pou la pour ed ou. Kot ou dekouraze, nou pou la pou donn ou sipor. Me se ou ki bezwen fer sa zefor. Se ou ki responsab pour ou lavenir".
Prezidan in osi note ki bann medya i devret zwe en pli gran rol pour edik piblik e fer piblisite pour promosyon bann bon pratik ki popilasyon i kapab adopte e adapte zot menm konman endividi pour rann zot lavi e lavi zot fanmiy meyer.
"Nou tou nou anvi sa ki meyer pour nou fanmiy ek nou pei. Nou'n montre rezilyans ek kouraz pou redres nou lekonomi. I pou pran sa menm kalite e plis pour anmenn sa transformasyon sosyal dan Sesel...Nou zanfan pe depann lo nou. Nou pei pe esper nou. Annou sezi sa moman. Nouvo Sesel --- se sa nou desten"...