Nou nasyon Seselwa fek viv en moman ekstraordiner ki'n anmenn lafyerte ek lazwa tou Seselwa dan en gran lelan patriyotizm.

Sikse dan lorganizasyon 8enm Zwe de Zil Losean Endyen i fer nou fyer koman en pei ki kapab mobiliz tou son dimoun ek tou son resours pou realiz en manifestasyon sportif ek lazenes tre o nivo pour larezyon.

Mon oule, avan tou, remersye tou Seselwa pour sipor total ki zot i'n donnen, zot lantouzyasm, zot langazman, lakey ekselan ek lospitalite salere anver bann envite larezyon. Zot i'n kontribye enormeman anver nou laviktwar.

Mon remersye tou dimoun ki'n enplike direkteman ou endirekteman dan lorganisazyon sa dernyen edisyon Zwe de Zil pasyonan.

Mon remersye tou bann federasyon, lasosyasyon sportif ek lekip antrener pour zot devouman ek preparasyon entansif atlet. Nou'n rekolte fri zot zefor.

Mon remersye tou sponsor pour zot kontribisyon. Nou vreman apresye sa partenarya ant Gouvernman, sekter prive e sosyete sivil ki lakle progre ek lepanwisman nou pei.

Mon remersye tou volonter ki'n resanti ki zot pei ti bezwen zot. Se volontarya ki fer bouze nou sosyete dan tou son laspe.

Mon remersye tou lazans ki'n fer mobilizasyon anplis pour asir bon deroulman Zwe de Zil. Mon adres en remersiman spesyal Lapolis e tou servis esansyel li'n asir bon deroulman sa gran levennman.

Mon remersye tou spektater ki ti ranpli bann stad ek lasal sportif pour aplodi nou atlet e fer nou Zwe de Zil vin en levennman spektakiler. Zot  ti en lafors dan zot memn!

Mon pli gran remersiman i al pour tou atlet.  Zot i'n donn tou sa ki zot kapab, lemeyer de zot menm, dan sa vre lespri en zenes Seselwa for, travayan, dinamik e determinen. Nou fyer de zot. Nou tre kontan ki nou'n resevwar en bon rekolt meday lor, larzan ek bronz - meyer rekolt ek rezilta ziska prezan -nou satisfe avek partisipasyon zot tou. Nou eksprim nou gratitid anver zot tou pour sa reisit eksepyonnel ki zot i'n anmenn pour nou patri.

Zwe de Zil i'n en moman gran lazwa pour nou pep. Nou'n ranforsi nou linite. Nou'n ralye deryer nou paviyon ek nou lim nasyonal. Avek en sans patriyotik nou'n demontre nou lanmour pour nou pti Sesel. Ansanm nou'n viv bann moman inoubliyab.   E nou konman en pep, sa laviktwar ki nou pei in gannyen I pa zis en selebrasyon me en manifestasyon nou linite, nou larmoni, nou idantite konman Seselwa e nou ferver patriotik.  E se sa ki nou merit touzour garde.  Se sa ki Sesel I merite!

Malgre nou pli pti pei dan Zwe de Zil, nou santi nou en vre zean kot i konsern kapasite pour organiz en levennman rezyonal sa lanpler, performans eksepsyonnel nou atlet e sikse ki nou'n rankontre. Nou'n kapab realiz nou zwe, lo nou zil, avek sikse.

Sak pwen ki nou'n marke dan sa zwe, sak meday ki nou'n ranporte, i'n en viktwar. Nou ti resanti sa fortman dan laplodisman nou pep. Nou Zwe de Zil i'n en lot viktwar pour Sesel. Me i'n osi en lot viktwar pour nou bann frer ek ser Losean Endyen.

Ansanm, dan linite, nou pou  kontinnyen anmenn ankor plis laviktwar pour Sesel. Ansanm, nou pou kontinnyen fer zetwal Sesel briye!